“Kitob yoki internet” — tafakkur chorrahasi

“Kutubxona — ikkinchi oilam” klubi doirasida “Zukko bilimdonlar” yo‘nalishining navbatdagi mashg‘uloti “Kitob yoki internet” mavzusiga bag‘ishlanib, mazmunli va qizg‘in ruhda tashkil etildi. 
Mashg‘ulot davomida o‘quvchilar kitob mutolaasining inson kamolotidagi beqiyos o‘rni, internetning zamonaviy hayotdagi ahamiyati, shuningdek, ularning afzallik va kamchiliklari haqida teran mulohazalar bildirdilar. Tadbir ochiq muloqot, savol-javoblar va jonli bahs-munozaralar asosida o‘tkazilib, ishtirokchilarning erkin fikrlashi va nutq madaniyatini rivojlantirishga xizmat qildi.

Mashg‘ulot mehmoni — O‘zbekiston Ekologik partiyasi bosh mutaxassisi, “Cho‘lpon” jamoat fondi raisi Muhammadrasul Mamatqulov bo‘lib, u yoshlarga kitobxonlik madaniyatini yuksaltirish, axborot manbalaridan oqilona va samarali foydalanish borasida qimmatli tavsiyalar berdi. Uning fikrlari ishtirokchilarni chuqur o‘ylashga, o‘z ustida ishlashga undadi. Tadbirda 14-umumta’lim maktabi o‘quvchilari — M. Vohidova hamda M. Sharipovalar faol ishtirok etib, o‘z bilim va fikrlari bilan ajralib turdilar.

Mashg‘ulot yakunida o‘quvchilarning bilim va dunyoqarashini kengaytirishga xizmat qiluvchi bunday tadbirlarning ahamiyati alohida ta’kidlandi.