Jadid adabiyoti — ma’rifat manbayi

Viloyat axborot-kutubxona markazida kitobxonlar uchun “Jadid adabiyoti — ma’rifat manbayi” mavzusida kitob ko‘rgazmasi tashkil etilib, unda jadid ma’rifatparvarlarining boy adabiy merosi namoyish etildi. Ko‘rgazmaning asosiy maqsadi jadid adabiyotining mazmun-mohiyatini keng targ‘ib qilish, yosh avlodni ilm-ma’rifatga hamda Vatanga muhabbat ruhida tarbiyalashdan iborat.

Ko‘rgazmada jadid adabiyotining yirik namoyandalari — Mahmudxo‘ja Behbudiy, Abdulla Avloniy, Abdurauf Fitrat, Abdulhamid Cho‘lpon kabi ma’rifatparvarlarning asarlari, ularning hayoti va faoliyatiga bag‘ishlangan kitoblar hamda ilmiy tadqiqotlar o‘rin oldi. Ushbu adabiyotlarda xalqni uyg‘otish, ilm-fan va taraqqiyotga chorlash g‘oyalari keng yoritilgan.

Ko‘rgazmaga tashrif buyuruvchilar jadid adabiyotining tarixiy ahamiyati hamda uning milliy uyg‘onish davridagi o‘rni haqida qimmatli ma’lumotlarga ega bo‘ldilar.